"16 წლის წინ მანქანის გადაჭარბებული სიჩქარის გამო რუსო იმქვეყნად გაფრინდა, მის ბიჭებს დედობა მაკამ გაუწია... ორი დღის წინ კი ავარიას მაკა შეეწირა და ახლა 4 ბიჭი დარჩა ობლად"- რას წერს ქუთაისში ავარიის შედეგად დაღუპულზე ოჯახის ახლობელი?
ქუთაისში 15 თებერვლის ღამეს მომხდარი ავტოსაგზაო შემთხვევა მსხვერპლით დასრულდა. პარლამენტის ყოფილ შენობასთან ქვეითად მოსიარულებს ავტომობილები დაეჯახათ. თვითმხილველების ინფორმაციით, ავტომობილებს გოგოები მართავდნენ და ისინი ერთმანეთს ეჯიბრებოდნენ. თუმცა არსებობს მეორე ვერსია, რომ საქმეში ორი ავტომობილი ფიგურირებს, ერთს ქალი მართავდა, მეორეს კი მამაკაცი.
ორი ქალბატონი "ზებრაზე" გადადიოდა, რა დროსაც სწრაფად მომავალმა მძღოლმა ქვეითები ვერ დაინახა და დაეჯახა. შეჯახება იმდენად ძლიერი იყო, რომ ორივე მათგანი ადგილზე დაიღუპა. ფაქტზე შსს-მ ერთი პირი, მამაკაცი დააკავა.
ცნობილი ხდება, რომ გარდაცვლილები ერთმანეთის მეზობლები არიან. დაღუპულია 65 წლის შურა ხურციძე და 44 წლის მაკა ქურდაძე.
სოციალურ ქსელში დაღუპული მაკა ქურდაძის ახლობელი ემოციურ პოსტს აქვეყნებს:
"უზომოდ მენანებით ამ ტკივილისთვის - სკოლის მერხზე შეეზარდნენ ერთმანეთს რუსო და მაკა. მერე რძალ-მული გახდნენ და ერთად ზრდიდდნენ რუსოს და მახოს ბიჭებს - ბექას და ბაჩოს.
მერე, 16 წლის წინ, ტუტუცი მძღოლის მიერ მანქანის გადაჭარბებული სიჩქარის გამო რუსო იმქვეყნად გაფრინდა. მერე მის ბიჭებს დედობა მაკამ გაუწია და თავისი ორი ბიჭიც ძმებად დაუზარდა.
მერე, ორი დღის წინ, ორი ტუტუცი და უმეცარი, სავარაუდოდ გონება მხოლოდ მანქანის საჭის ტრიალის ინსტინქტს რომ კარნახობს, ქუთაისის პარლამენტის შენობის წინ "საგონკაოდ" გამოეთრა და ახლა მაკა შეიწირა.
რა და როგორ დატოვეს ვერ დავწერ, რადგან არ ვკითხულობ, ვერ გაუძლებს ჩემი დღემდე მყიფე მდგომარეობა ამის გაგებას. ისიც ძალიან მიჭირს, რაც გავიგე. თქვენ შეგიძლიათ მოიძიოთ ინფორმაცია.
ახლა ოთხი ბიჭი დარჩა ობლად...
შენს თავს რომ იმეტებ, უმეცარო და ტუტუცო, სხვას რას ერჩი??? მის შვილებს და დედას (რომელსაც სამძიმარს ვერასოდეს ვერ შევბედავ) რას ერჩი???
დააყენო უნდა ახლა ის ორი მაკას პანაშვიდებზე და თვალი არ მოაცილებინო ჭირისუფლისთვის და ობოლი ბავშვებისთვის..... ციხე არაფერია, ციხით არაფერი გამოსწორდება"...